Палітзняволеная, мама якой была вымушаная з яе дзецьмі з'ехаць за мяжу, сустрэлася з сям'ёй

Мама былой палітзняволенай Антаніны Канавалавай Ганна Канавалава апублікавала ў сваім блогу ў Facebook відэа іх сустрэчы. Палітзняволеная змагла выехаць за мяжу і сустрэцца з дзецьмі.

«Ну вось, здзейснілася!!! Мы дачакаліся!!! Пасля 1555 дзён няволі… Мы нарэшце змаглі абняцца! Вельмі цаню, люблю кожнага з вас, хто дапамагаў мне і дзецям выстаяць, а часам і выжыць. Я перад вамі ў неаплачаным даўгу. Усіх абдымаю», — напісала Ганна Канавалава.

У відэа Антаніна Канавалава таксама падзякавала ўсім за падтрымку.

Пра тое, што Антаніну Канавалаву вызвалілі, стала вядома 15 снежня 2024 года.

Яе маці, Ганна Канавалава, была вымушаная разам з унукамі бегчы за мяжу пасля арышту дачкі.

Антаніна Канавалава знаходзілася за кратамі з 6 верасня 2020 года. Яна была даверанай асобай Святланы Ціханоўскай падчас прэзідэнцкіх выбараў. Спачатку яе судзілі па адміністрацыйнай справе, але пасля так і не адпусцілі. Жанчыну абвінавачвалі па арт. 293 КК (Масавыя беспарадкі). У траўні 2021 года Антаніну асудзілі на пяць з паловай гадоў калоніі агульнага рэжыму. А праз год КДБ уключыў палітзняволеную ў «спіс асоб, якія маюць дачыненне да тэрарыстычнай дзейнасці». У калоніі яна атрымала інваліднасць трэцяй групы па зроку.

У Антаніны двое маленькіх дзяцей. Яе муж, Сяргей Ярашэвіч, таксама знаходзіцца ў зняволенні. Яго асудзілі на шэсць гадоў і тры месяцы калоніі ўзмоцненага рэжыму.