Палітзняволеная Паліна Шарэнда-Панасюк вырашыла адмовіцца ад беларускага грамадзянства на знак пратэсту супраць катаванняў у калоніі. Пра гэта расказаў у Facebook яе муж Андрэй Шарэнда.
Паводле яго словаў, Паліна падала афіцыйны зварот пра выхад з беларускага грамадзянства, пасля чаго яе этапавалі з калоніі № 24 для праходжання судова-псіхіятрычнай экспертызы.
«На Паліну працягваецца каласальны фізічны ціск. Паліну фактычна ўвесь час трымаюць у штрафным ізалятары. Толькі за апошнія 5 месяцаў яна правяла ў жудасных умовах ШІЗА 120 дзён, а агулам за няпоўны год знаходжання ў калоніі № 24 больш як 200 дзён. І гэта без уліку месяцаў, праведзеных у ПКТ, дзе ўмовы не значна лепшыя за штрафны ізалятар. Паліну марудна, але мэтанакіравана забіваюць. Арганізм Паліны настолькі знясілены, што ёй ужо цяжка хадзіць. Праз адсутнасць сонечнага святла зрок у Паліны моцна сапсаваўся», — написал Андрей Шарендо.
Ён расказаў, што днямі да маці Паліны чарговым разам вярнулася бандэроль з медыкаментамі, якія неабходныя палітзняволенай.
«Паліна адмаўляецца ад беларускага грамадзянства і падала афіцыйны зварот на гэта. <…> Паліна цалкам адмаўляецца падпарадкоўвацца адміністрацыі калоніі, суду і іншым сілавым структурам. Паліна падкрэслівае, што застаецца беларускай і патрыёткай сваёй Радзімы — Беларусі і будзе да канца жыцця змагацца за яе свабоду», — паведаміў Андрэй Шарэнда.
Нагадаем, Паліну Шарэнду-Панасюк затрымалі 3 студзеня 2021 года, пазней ёй выставілі абвінавачанне па арт. 364 КК (Гвалт у дачыненні да супрацоўніка міліцыі) — яна падрапала аднаго з міліцыянтаў, якія прыйшлі да яе дадому. Праз нейкі час дадаліся абвінавачанні па арт. 368 КК (Абраза прэзідэнта) і арт. 369 КК (Абраза прадстаўніка ўлады).
У чэрвені 2021 года актывістку асудзілі на два гады пазбаўлення волі. Паліна адбывала пакаранне ў Гомельскай жаночай калоніі. 7 красавіка 2022 года стала вядома, што палітзняволенай прызначылі яшчэ год калоніі за наўмыснае непадпарадкаванне патрабаванням адміністрацыі ўстановы выканання пакаранняў — па тым самым артыкуле, па якім на яе завялі новую крымінальную справу.
22 ліпеня 2022 года з’явілася інфармацыя, што палітзняволеная знаходзіцца ў ПК № 24. Вядома, што за першыя чатыры месяцы ў калоніі Паліну восем разоў змяшчалі ў ШІЗА, дзе яна прабыла амаль тры месяцы. Пасля гэтага, 12 кастрычніка, жанчыну на шэсць месяцаў змясцілі ў ПКТ.
Пазней на Паліну завялі яшчэ адну справу — па ч. 2 арт. 411 КК за «злоснае непадпарадкаванне патрабаванням адміністрацыі папраўчай установы».
Чытайце таксама
