У ноч на 6 кастрычніка ў Калодзішчах і мінскім Уруччы быў чуваць гук выбуху. Відавочцы кажуць, што ў некаторых дамах «затрэсліся вокны». Таксама мясцовыя жыхары абмяркоўваюць тое, што следчыя апытваюць людзей з нагоды тэракту на чыгуначнай станцыі Азярышча. Даведаліся, што пра гэта вядома, і патэлефанавалі чыноўнікам.
«Я а*****ла проста»
Мяркуючы з чата жыхароў Калодзішчаў у Telegram, выбух адбыўся каля 23.20. Пасля гэтага часу людзі пачалі актыўна пытаць, ці чулі выбухі іншыя і што наогул адбываецца.
— Я а*****ла проста, — пісала адна з удзельніц чата пад нікам Энжы. — Думала, вокны вылецяць. Такога ніколі не было…
Каля паўночы яшчэ адна мясцовая жыхарка, Таццяна, пісала, што ў баку чыгункі бачыла «ці то святло, ці то нешта гарэла».
Мяркуючы з перапіскі, побач з Калодзішчамі перыядычна праходзілі вучэнні, і да шуму людзі прывыклі. Але ў чаце адзначаюць, што так позна выбухаў ні разу не чулі.
— Звычайна гэта якія-небудзь вучэнні на палігоне, якія настолькі моцна не шумяць. Ды яшчэ і так позна, — напісала Вікторыя. А як адзначыла Энжы, звычайна падчас вучэнняў пасля паўночы «на палігоне была цішыня поўная, толькі вецер».
Ужо раніцай 6 кастрычніка мясцовыя жыхары перасылалі інфармацыю ад сваіх знаёмых пра тое, што каля Азярышча сілавікі апытвалі людзей. І нібыта расказалі, што ў раёне чыгункі «збілі пяць беспілотнікаў».
МНС: «Я вас запэўніваю, што ўсё добра»
Што адбылося гэтай ноччу і чаму быў чуваць выбух? З такім пытаннем журналістка «Люстэрка» патэлефанавала ў Мінскае гарадское ўпраўленне МНС як усхваляваная грамадзянка.
— Учора ўвечары ва Уруччы былі нейкія выбухі чуваць, а цяпер пішуць, што гэта быў нейкі тэракт. А ў чатах наогул кажуць, што ледзь не дроны збівалі. Раскажыце, што здарылася? А то афіцыйнай інфармацыі я нідзе не знайшла.
— Усё добра, нічога няма, — адказаў дзяжурны. — Гэта вучэнні праходзяць.
— У сэнсе вучэнні? А выбухі ад чаго?
— Патэлефануйце ў Мінабароны, можа, яны вам што раскажуць. У нас інфармацыі няма.
— Але проста так бахнула, а ў чатах пішуць, што следчыя апытваюць людзей і расказваюць, маўляў, быў тэракт. Я ўжо перажываю.
— Не турбуйцеся, усё добра.
— Дык вы хочаце сказаць, гэта былі вучэнні? А чаму ноччу?
— Не магу вам сказаць больш нічога.
— Дык, а будзе ўвогуле нейкая інфармацыя пра тое, што здарылася? Бо наогул незразумела, што адбываецца.
— Абсалютна не хвалюйцеся, я вас запэўніваю, што ўсё добра. Калі вельмі перажываеце, прыязджайце да нас, мы вам зробім гарбату.
Мінабароны: «Не ведаю. Можа, петарды нейкія»
Як і раіў супрацоўнік МНС, мы патэлефанавалі ў прыёмны пакой міністра абароны.
— Учора ўначы ва Уруччы быў чуваць нейкі выбух незразумелы. А сёння вось усюды пішуць, што быў тэракт. Я тэлефанавала ў МНС, там кажуць, гэта, напэўна, вучэнні, тэлефануйце ў Мінабароны. Але якія вучэнні, а палове дванаццатай ночы?
— Не ведаю. Можа, петарды нейкія былі.
— Проста людзі пішуць, што па вайсковым гарадку ходзяць следчыя і кажуць, што быў тэракт на чыгунцы, дзе станцыя Азярышча.
— Які тэракт?
— Не ведаю, я ж вам таму і тэлефаную.
— Нічога няма. Слухайце афіцыйную інфармацыю. Там нешта хтосьці распаўсюджвае — гэта ўсё чуткі. Жывіце сабе спакойна.
— Дык, а будзе нейкая афіцыйная інфармацыя, што там здарылася?
— Ёсць афіцыйная інфармацыя? Не. Раз не, значыць, нічога не было.
— Дык як нічога не было, калі бахнула нешта вельмі гучна.
— Ну што, па вуліцы гуляеш, а там салюты нехта пускае і бабахне. Ці петарду нейкую вялікую кінулі.
— Але вось пішуць у чатах, што вокны трэсліся нават.
— Ну вось у вас вокны трэсліся? Не? Ну дык і жывіце сабе спакойна.
БЧ: «Спазненняў па дадзеным участку няма»
У даведцы Беларускай чыгункі расказалі, што пра інцыдэнт таксама нічога не чулі.
— Гэтай ноччу ў Калодзішчах былі чуваць выбухі, і кажуць, што быў тэракт на чыгунцы ў Азярышчы. А ў МНС кажуць, што ўсё нармальна. Можа, вы падкажаце, што адбываецца?
— Рэч у тым, што ў нас няма ніякай інфармацыі, гэта не кампетэнцыя Беларускай чыгункі, — адказала супрацоўніца гарачай лініі. — Мы адказваем за перавозкі. Вы хочаце ехаць цягніком па гэтым участку?
— Не, я хацела проста даведацца, што здарылася. Бо ніхто нічога не кажа. А то ледзь не пра тэракт пішуць, і наогул незразумела, што думаць.
— На дадзены момант такой інфармацыі ў нас няма, і спазненняў па гэтым участку таксама няма.
Між тым пакуль ні Мінабароны, ні МНС, ні СК афіцыйна ніяк не пракаментавалі выбухі, якія чулі людзі. Пры гэтым супольнасць беларускіх чыгуначнікаў днём 6 кастрычніка пацвердзіла — выбухі былі:
— Паводле папярэдняй і пакуль неверыфікаванай інфармацыі, пашкоджаны ўчастак чыгуначнага палатна і стрэлачнага пераводу, якія злучаюць станцыйныя шляхі з пагрузачна-разгрузачнымі ў месцы знаходжання грузавых рампаў. Гэтыя інжынерныя збудаванні на названай станцыі перыядычна задзейнічаюцца для выканання пагрузачна-разгрузачных аперацый з ваеннай тэхнікай.
