Вы калі-небудзь задумваліся, як выглядае знутры вятрак? І якія агляды адкрываюцца, калі залезці на самы верх? Наш суайчыннік Максім працуе ў Польшчы прамысловым альпіністам, і для яго такія віды сталі практычна руцінай. Беларус апублікаваў відэа, у якім паказаў, як уладкаваная адна з самых высокіх у Польшчы ветраных электрастанцый і што можна ўбачыць з яе верху.
Максім расказвае, што цяпер займаецца абслугоўваннем самых высокіх у Еўрасаюзе пабудаваных на сушы ветракоў. Вышыня ветрагенератара, які хлопец паказвае ў сваім апошнім відэа, 160 метраў.
— Праязджаючы на машыне міма якога-небудзь віндпарка (ад англ. wind park, група ветравых турбін, якія размешчаныя ў адным месцы і выкарыстоўваюцца для вытворчасці электраэнергіі. — Заўв. рэд.), вы, хутчэй за ўсё, бачылі, як ветракі стаяць дзесьці ў полі, але з машыны не адчуваюцца маштабы гэтага збудавання. І толькі апынуўшыся перад імі, разумееш, наколькі ж яны велізарныя. На хвілінку, вышыня адной толькі 160-метровай вежы — гэта прыкладна 40-павярховы будынак, — апісвае ён.
Даўжыня лопасці такога «вентылятара» — 80 метраў. Падчас працы з-за ветру канструкцыя вібруе, ніты, якія змацоўваюць яе бетонную і металічныя часткі, расхістваюцца, могуць адколвацца часцінкі бетону. Прамысловыя альпіністы патрэбныя, каб своечасова выявіць усе гэтыя непаладкі, кажа Максім і прапануе зайсці з ім унутр.
Унутры турбіны знаходзіцца ліфт, які і падымае альпіністаў наверх. Зайшоўшы ў яго, неабходна трасамі прышпіліцца да спецыяльных карабінаў.
— На жаль, былі выпадкі, калі адломлівалася падлога ліфта, што прыводзіла да трагічных наступстваў, — тлумачыць хлопец правілы тэхнікі бяспекі.
Пад’ём на самы верх займае прыкладна восем хвілін.
— Тры песні можна паспець паслухаць, — заўважае Максім.
Калі неабходныя работы ўнутры выкананыя, ніты правераныя і падкручаныя, хлопец паказвае, мабыць, самую відовішчную частку сваёй прафесіі. Па размешчанай унутры ветрака лесвіцы ён падымаецца яшчэ вышэй і выходзіць на гандолу.
Гэта корпус, у якім знаходзіцца ветрагенератар, і ад яго ж адыходзяць лопасці.
— Вельмі прыгожыя віды адкрываюцца вакол: такія прасторы, куча іншых віндпаркаў, усюды на гарызонце лясы, палі, вёсачкі, — захоплена кажа Максім. — Вельмі прыгожа, велізарная проста лопасць, 80 метраў моцы. Увогуле, падымае настрой, займае дыханне. Нягледзячы на тое што я ўжо нейкі час працую на вышыні, трошкі прывык да ўсіх гэтых відаў і няма таго захаплення, якое было першы раз, усё роўна вельмі класна. Я б тут цэлы дзень сядзеў, люблю знаходзіцца ў такіх месцах.
